| | 5 МАРТА 2015 (Четверг) 11:38:21 11 сакавіка ў 19.30 у Камернай зале імя Л.П.Александроўскай адбудзецца ўнікальны канцэрт “Залатыя старонкi кантавай культуры Беларусi XVII-XVIII стагоддзяў” у выкананні салістаў Вялікага тэатра Беларусі. У выкананні лаўрэатаў міжнародных і нацыянальных конкурсаў і фестываляў Алены Золавай, Наталлі Акінінай, Юрыя Гарадзецкага, Ларысы Церахавай (фартэпіяна) і Дзмітрыя Гарбачука (труба), Сяргея Лазарэвіча прагучаць фрагменты беларускіх музычных твораў, якія, дзякуючы даследчыкам старажытнай нацыянальнай культуры і сучасным музыкантам, набылі сваё другое нараджэнне ў канцы мінулага – пачатку новага стагоддзя.
У першым аддзяленні канцэрта прагучаць “Псалмы Давідавы” ў перакладах Сімяона Полацкага, пакладзеныя на музыку ананімных аўтараў XVII-XVIII стагоддзяў у апрацоўцы К. Шарава.
Госці вечара ў першым аддзяленні пачуюць таксама фрагменты араторыі Ігара Хадоскі “Жальбы”, у аснову якой пакладзены жалобныя галашэнні на Распяцце Хрыстова. Пасьён, альбо Страсці (ад лацінскага passio – пакуты) – гэта музычны твор, заснаваны на евангельскім тэксце пра пакуты і смерць Хрыста. Гэты жанр быў вельмі папулярны ў еўрапейскай музычнай культуры эпохі барока, а яго вяршыняй з’яўляюцца сусветна вядомыя шэдэўры І.С.Баха “Страсці па Матфею” і “Страсці па Іаану”. У “Жальбах” Ігара Хадоскі выкарыстана музыка, сабраная на працягу некалькіх дзесяцігоддзяў у касцёлах ад Любліна да Яраслаўля.
У другім аддзяленні гледачоў чакае сустрэча з вакальнай сюітай у апрацоўцы К.Шарава, у аснову якой пакладзены “Полацкі сшытак” (музыка) і “Аршанскі сшытак” (словы) - кампазіцыі ананімных аўтараў XVI — XVII стагоддзяў. Таксама госці вечара пачуючь фрагменты “Курантаў” – зборніка беларускай, польскай і ўкраінскай музыкі, знойдзенага ў Салтыкоўскай бібліятэцы Санкт-Пецярбурга. Адзін з самых папулярных твораў старажытнай музычнай спадчыны Беларусі – “Полацкі сшытак” - успрымаецца беларускім грамадствам як своеасаблівы музычны брэнд Беларусі XVII стагоддзя. У “Полацкім сшытку” сабраны песні (канцоны) і танцы заходне- і ўсходнееўрапейскага паходжання. Сёння гэтыя творы вельмі папулярныя, але мала хто ведае, наколькі яны старадаўнія.
Рэжысёр і вядучы – заслужаны артыст Беларусі, мастацкі кіраўнік “Беларускай Капэлы” Віктар Скарабагатаў.
Замовіць білеты на канцэрт “Залатыя старонкi кантавай культуры Беларусi XVII-XVIII стагоддзяў” можна праз Інтэрнэт: http://www.kvitki.by/ru/buy/24046#plan
/ sobor.by/
(просмотров 2573) |
ГЛАВНАЯ
ФОТО
ВИДЕО
АУДИО
НОВОСТИ
ФОРУМ
