|
| | 1 НОЯБРЯ 2016 (Вторник) 12:28:03 Напярэдадні дня памяці Сабора новапакутнікаў і спавядальнікаў зямлі Беларускай брацтва імя свяшчэннамучаніка Уладзіміра Хіраска адзначыла дзень брацтва. Па традыцыі свята было адзначана начной Літургіяй, дзе братчыкі прычасціліся Святых Хрыстовых Таінcтваў.
Разам з братчыкамі святочную радасць сёлета раздзяліў і ганаровы госць - айцец Дзмітрый Ворса, настаяцель мінскага прыхода імя свяшчэннамучаніка Уладзіміра Хіраска.
Пасля Літургіі братчыкаў аб'яднала сумесная агапа, дзе святкаванне працягнулася ўсялякімі прысмакамі ды прыгожымі спевамі.
Амаль што адразу пасля агапы (каля 10 раніцы) брацтва зноў сабралася разам на суботнік, на якім хлопцы прыбіралі тэрыторыю прыхода ў гонар іконы Божай Маці "Усіх тужлівых Радасць" да прэстольнага свята - 6 лістапада.
- На дзіва працавалася нам вельмі добра і радасна, нягледзячы на тое, што многія братчыкі спалі па 2-3 гадзіны, а хтосьці не спаў і зусім! - бадзёра распавядае братчык Аляксандр Пяткевіч. - Гасподзь падтрымліваў нас сонейкам і з'яўленнем вясёлкі - знака завета з Богам.
Але і на суботніку моладзь не супакоілася - у панядзелак святкаванне працягнулася з новай сілай. Брацтва сабралася ў трапезнай прыхода, дзе быў весела праведзены час за гульнямі, спевамі і ласаваннем прысмакаў. Таксама ў гэты дзень па традыцыі быў абраны старшыня брацтва падлікам сабраных галасоў.
- Калі вы малады ці целам, ці духам, калі вы актыўны, поўны сілы і хочаце на справе паслужыць Хрысту, то запрашаем у нашае брацтва, якое збіраецца па панядзелках а 19 гадзіне ў 228 кабінеце нядзельнай школы мінскага прыхода іконы "Усіх тужлівых Радасць", - запрашае Аляксандр. - Дзякуй Богу за ўсё і шмат год нашаму брацтву!
Група брацтва імя Уладзіміра Хіраска ўкантакце >>>
/ sobor.by/
(просмотров 3344) |
