Двухдзённы паход у “Андрывондж”. Падлеткі з дзіцячага дома №5 адпачылі з брацтвам Уладзіміра Хіраска

9 ИЮНЯ 2015 (Вторник)15:39:44

Раніцай у суботу падлеткі з дзіцячага дома №5 разам з валанцёрамі брацтва ў гонар свяшчэннамучаніка Уладзіміра Хіраска накіраваліся з ранцамі на чыгуначны вакзал “Мінск-Пасажырскі". Так пачаўся першы ў жыцці дзяцей двухдзённы паход з начлегам на прыродзе.

Даехаўшы да Маладзечна, турысты крыху адпачылі ў скверыку на вакзале - паласаваліся марозiвам з печывам - і селі на дызель у напрамку Ліды. На станцыі Багданаў падарожнікі сышлі і пешшу накіраваліся да пункта свайго галоўнага прызначэння – паляўнічай сядзібы Храптовічаў “Андрывондж” (Валожынскі раён Мінскай вобласці).

- Дарога пешшу ў 8 км. была складанай з-за спякоты і груза за плячыма, але за 2 гадзіны мы яе здолелі! – распавядае кіраўнік брацтва Павел Вабішчэвіч.

Ля сядзібы Храпточіваў цячэ рэчка Гальшанка, шуміць ліставы лес. Некранутая чалавекам трава вырасла так, што да рэчкі моладзь спачатку не магла падысці. Але хлопцы хутка расчысцілі месца, арганізавалі вогнішча, усталявалі палаткі, так, што яшчэ да вечара падлеткі разам з дарослымі паспелі накупацца. Крыху адпачыўшы, падарожнікі пакінулі дзяжурных рыхтаваць вячэру і накіраваліся на вячэрняе богаслужэнне ў вёску Вішнева, у царкву святых Космы і Даміяна, адолеўшы яшчэ 3 км. пешшу.

Пасля службы паломнікі ўзялі благаслаўленне мясцовага бацюшкі, айца Аляксандра, і вярнуліся ў лагер, дзе іх ужо чакаў суп з кураня. Падсілкаваўшыся, усе разам падрыхтаваліся да нядзелі і начлега: укрылі рэчы ад дажджу, саборна памаліліся. Хутка прыгатавалі святочную вячэру, калі з вёскі прыйшоў запрошаны госць - айцец Аляксандр. Бацюшка распавёў пра гісторыю Вішнева і пра свой прыход, запрасіў падарожнікаў на юбілей: у гэтым верасне царква святых Космы і Даміяна будзе святкаваць сваё 150-годдзе. З гэтай нагоды зараз у храме ідзе рамонт, распісваюцца сцены, будуецца алтар.

Хутка і спакойна прайшла ноч. У нядзелю лагер прачнуўся а 8 раніцы і, саборна памаліўшыся, накіраваўся на Літургію. Мінчане прычасціліся Святых Хрыстовых Тайнаў і пазнаёміліся з прыхажанамі храма, якія пачаставалі падарожнікаў вясковым малаком і тварагом з варэннем.

- На зваротным шляху мы ўбачылі мясцовае возера, прыгажосць якога разам з Прычасцем стала для нас адкрыццём дня, - узгадвае Павел. – Прыйшлося затрымацца, бо не пакупацца ў ім мы не маглі. Падсілкоўваліся гасцінцамі ад прыхажан.

Здолеўшы ад царквы да лагера 3 км. пешшу, а адтуль яшчэ 8 км. да вакзала, моцна стомленыя ад спякоты і фізнагрузкі, у цягніку падлеткі дружна адпачывалі пад гітарныя спевы сваіх старэйшых сяброў.

- Спявалі мы песні з дзіцячых мультфільмаў, а таксама творы гурта NRM, Цоя ды іншых, - кажа Павел. - Лідэрам спеваў сталі “Тры чарапахі” NRM і песня на верш “Люблю” Канстанцыі Буйло - дзеці падпявалі і прасілі іх зноў і зноў. Нават пасажыры падстуквалі ў такт.

У дзіцячы дом падлеткі вярнуліся з заходам сонца. Сустракалі іх як першаадкрывальнікаў, што і праўда, бо такое вялікае падарожжа яны здейснілі ўпершыню.

- Спадзяюся, што не ў апошні раз, - з усмешкай адзначае Павел.

/ sobor.by/

(просмотров 4679)