ГЛАВНАЯ
ФОТО
ВИДЕО
АУДИО
НОВОСТИ
ФОРУМУ “Беларускі праваслаўны каляндар” на 2011 год увайшлі новыя імёны святых.
11 ДЕКАБРЯ 2010 (Суббота) 19:09:48 “Беларускі праваслаўны каляндар” на 2011 год падрыхтаваны да друку выдавецкім аддзелам праваслаўнага брацтва Святых Віленскіх мучанікаў пры Свята-Петра-Паўлаўскім саборы Мінска. Выданне такіх календароў пачалося ў 1994 годзе, і штогод каляндар папаўняецца імёнамі новых святых, у тым ліку –праслаўленых на беларускай зямлі. Асаблівасцю гэтага выдання стала ўключэнне ў пералік святых свяшчэннамучаніка Аляксія, прасвітара Лельчыцкага (памяць 20 кастрычніка), праслаўленага ў Тураўскай епархіі. Навамучанікі, праслаўленыя ў іншых епархіях РПЦ , якія сваім паходжаннем або служэннем звязаны з Беларуссю, рашэннем Святога Сінода Беларускай Праваслаўнай Царквы ад 15.12. 2009 года аб’яднаны ў Сабор Жыровіцкіх святых. Чакаецца, што 1студзеня 2011 года каляндар паступіць у продаж. У дадатку да календара змешчаны матэрыял, прымеркаваны да кананізацыі яшчэ аднаго святога – прападобнага Лявонція, архімандрыта Віленскага (+1620). Упершыню ў перакладзе на сучасную беларускую мову надрукавана пропаведзь архімандрыта Лявонція – Слова на Праабражэнне Госпада і Спаса нашага Іісуса Хрыста, прамоўленая ім у Віленскім Свята-Духавым саборы. Прапаведніцкі талент архімандрыта Лявонція быў шырока вядомы на Віленшчыне і ва ўсім Вялікім княстве Літоўскім .Прафесар Нячаенка пісаў аб яго пропаведзях: “ За сто з лішнім гадоў да нашага Феафана Пракаповіча быў у нас красамоўца, які простымі размоўнымі і пісьмовымі словамі і мовай, зразумелай вяльможам і пасялянам ад гор Карпацкіх і да Данца Северскага, прамаўляў ісціны высокія немудрагеліста, але захапляльна; размаўляў з дзецьмі Царквы так выразна і к разуменню ісцін падводзіў так блізка, што і ў перыяд навейшага красамоўства нашага толькі нямногія наблізіліся да яго”. І сапраўды, пропаведзь уражвае глыбінёй думкі, гарманічным спалучэннем веры і розуму, благадатнага ведання і пачуццёвай формы, што набліжае яе да пропаведзі апостальскай. У гэтым жа раздзеле надрукаваны артыкул протаіерэя Сергія Гардуна пра жыццёвы шлях і веравызнаўчы подзвіг прападобнага Лявонція, архімандрыта Віленскага. Другі раздзел Дадатка прысвечаны 80-годдзю памяці мітрапаліта Мінскага і Беларускага Мелхіседэка Паеўскага (1879—1931). Уладыка Мелхіседэк прыехаў у Мінск у канцы 1918 года ,калі на тэрыторыі Беларусі разгортваліся ваенныя і рэвалюцыйныя падзеі. Яны адбіліся не толькі на лёсах і дабрабыце насельніцтва, але і прынеслі разлад і вялікія выпрабаванні Царкве Хрыстовай. У такіх умовах галоўным клопатам уладыкі было зберагчы паству, захаваць адзінства Царквы перад пагрозай пасягальніцтва абнаўленцаў і правакацый з боку ГПУ. Няцяжка ўявіць, якія душэўныя пакуты прыйшлося перажыць інтэлігентнаму і адукаванаму ўладыку, трапіўшы ва ўмовы “ваеннага камунізму” і царкоўных расколаў. Але архіпастырская мудрасць і вера ў Промысел Божы дазвалялі яму супрацьстаяць спакусам “веку гэтага” і захоўваць вернасць Госпаду і Яго Царкве. Заключны тэматычны раздзел прысвечаны народнаму ўшанаванню Божае Маці. У хрысціянскай традыцыі Прасвятая Багародзіца ўшаноўваецца вернікамі як апякунка храмаў, манастыроў і цэлых народаў. Прыводзяцца звесткі пра шанаваныя іконы Божае Маці, якія былі яўлены на нашай зямлі і ў глыбокай старажытнасці, і ў больш познія часы. Гісторыя ўшанавання ікон сведчаць пра глыбокую любоў народа да Прасвятой Багародзіцы і ўдзячнасць Ёй за невычэрпную духоўную дапамогу. Лідзія Кулажанка, рэдактар выдавецкага аддзела праваслаўнага брацтва Святых Віленскіх мучанікаў пры Свята-Петра-Паўлаўскім саборы Мінска. / sobor.by/(просмотров 2884) |
Новости разделов:
|
|||||
|
© www.sobor.by 2004-2016. |
|||||